Göngum í skólann 2022

Nú styttist í að verkefnið Göngum í skólann (www.gongumiskolann.is) hefjist en það verður sett í sextánda sinn sinn 7. september næstkomandi og lýkur formlega með alþjóðlega Göngum í skólann deginum www.iwalktoschool.org miðvikudaginn 5. október.
Markmið verkefnisins er að hvetja börn til að tileinka sér virkan ferðamáta í og úr skóla og auka færni þeirra til að ferðast á öruggan hátt í umferðinni. 

Ein einfaldasta leiðin til að auka hreyfingu í daglegu lífi er að velja virkan ferðamáta, svo sem göngu, hjólreiðar, hlaup, línuskauta, hjólabretti eða annað. Ávinningurinn er ekki aðeins bundinn við andlega og líkamlega vellíðan heldur er þetta einnig umhverfisvæn og hagkvæm leið til að komast á milli staða. 

Á hverju ári taka milljónir barna í yfir 40 löndum víðs vegar um heiminn þátt í Göngum í skólann með einum eða öðrum hætti. Hér á landi hefur þátttakan vaxið jafnt og þétt og fyrsta árið voru þátttökuskólarnir 26 en alls 78 skólar skráðu sig til leiks árið 2021.

Óskum við nú eftir liðsinni ykkar til að hvetja til þátttöku og auðvelda foreldrum og börnum að velja virkan ferðamáta. Það getið þið m.a. gert með því að nýta heimasíður og Facebooksíður til að segja frá verkefninu og hvetja iðkendur (grunnskólabörn) innan ykkar raða til að taka þátt. 

Á heimasíðu Göngum í skólann www.gongumiskolann.is eru allar nánari upplýsingar um verkefnið en þar má meðal annars finna skemmtilegar útfærslur nokkurra skóla á Íslandi á verkefninu auk ýmiss annars efnis frá þátttökuskólunum. 

Á vef samgöngustofu má finna frábær myndbönd um umferðaröryggi https://www.umferd.is/nemendur/5-7-bekkur/leikir/myndbond